ໃນຕອນເຊົ້າຂອງວັນອາທິດ, ວັນທີ່ 9 ມິຖຸນາ 2019 ນີ້, ໄດ້ມີພິທີເປີດໂຮງງານຜະລິດລິບລາວຈຳກັດຂຶ້ນຢ່າງເປັນທາງການ, ເຊິ່ງເປັນໂຮງງານຜະລິດລິບແຫ່ງທຳອິດຂອງລາວ, ເປັນກຽດເຂົ້າຮ່ວມໃນພິທີໂດຍທ່ານນາງ ນາລີ ສີສຸລິດ ພັນລະຍາທ່ານນາຍົກລັດຖະມົນຕີແຫ່ງ ສປປລາວ, ທ່ານ ພັນທອງ ພິດທຸມມາ ຮອງລັດຖະມົນຕີກະຊວງ ອຸດສາຫະກຳ ແລະ ການຄ້າ, ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວແຫ່ງ ສປປລາວ, ທ່ານ ປອ. ສີສະຫລຽວ ສະແຫວງສຶກສາ ປະທານໂຮງງານຜະລິດລິບລາວຈຳກັດ, ທ່ານ ພູວົງ ສີຫາປັນຍາ ຜູ້ອຳນວຍການໂຮງງານຜະລິດລິບລາວຈຳກັດ, ມີບັນດາແຂກຜູ້ຊົງຄຸນນະວຸດ ແລະ ສື່ມວນຊົນຫລາກຫລາຍຂະແໜງການເຂົ້າຮ່ວມ.

“ໂຮງງານຜະລິດລິບລາວແມ່ນໂຮງງານຜະລິດລິບແຫ່ງທຳອິດຂອງລາວ, ໂຮງງານນີ້ໄດ້ນຳໃຊ້ສ່ວນປະກອບ ແລະ ເຕັກໂນໂລຊີຈາກຢູໂຣບ, ມໍເຕີ້ສັ່ງຈາກປະເທດອິຕາລີ, ລະບົບປະຕູຈາກປະເທດສະເປນ ແລະ ລະບົບຄວບຄຸມລິບຂຶ້ນລົງເປັນເຕັກໂນໂລຊີຈາກປະເທດຝຣັ່ງ, ມີລະບົບປ້ອງກັນປະຕູໜີບຜູ້ໂດຍສານ ຫລື ສິ່ງຂອງດ້ວຍແຖບເຊັນເຊີ້ທີ່ບານປະຕູທັງສອງຂ້າງ, ຜະລິດຕະພັນຫລັກຂອງໂຮງງານຜະລິດລິບລາວແມ່ນລິບໂດຍສານ, ລິບຂົນເຄື່ອງ ແລະ ລິບໂຮງໝໍ, ນອກຈາກນີ້ໂຮງງານຜະລິດລິບລາວຍັງມີຄວາມສາມາດຜະລິດຂັ້ນໄດເລື່ອນ ແລະ ຕັ່ງຍົກສຳລັບຄົນພິການ ແລະ ຜູ້ສູງອາຍຸນຳດ້ວຍ, ໂຮງງານດັ່ງກ່າວນີ້ແມ່ນການຮ່ວມລົງທຶນຂອງນັກທຸລະກິດລາວ 100% ລະຫວ່າງທ່ານ ປອ. ສີສະຫລຽວ ສະແຫວງສຶກສາ ແລະ ທ່ານ ພູວົງ ສີຫາປັນຍາ; ໂດຍທ່ານ ພູວົງ ສີຫາປັນຍາ ເປັນນັກວິສະວະກອນທີ່ມີປະສົບການເຮັດວຽກກັບໂຮງງານຜະລິດລິບຍີ່ຫໍ້ໂອເລໂອດິນທີ່ປະເທດຝຣັ່ງຫລາຍກວ່າ 30 ປີ, ທ່ານຍັງເປັນຜູ້ອຳນວຍການໂຮງງານຜະລິດລິບໂອເລໂອດິນລາວ-ເອເຊຍທີ່ປະເທດໄທອີກ 10 ກວ່າປີ”
ໃນໄລຍະຜ່ານມາທາງໂຮງງານຜະລິດລິບລາວແມ່ນໄດ້ຜະລິດລິບສະໜອງໃຫ້ແກ່ຕຶກ ແລະ ອາຄານຕ່າງໆໃນນະຄອນຫລວງວຽງຈັນ ແລະ ເມືອງວັງວຽງເຊັ່ນ : ລິບແກ້ວທີ່ອາຄານ 6 ຊັ້ນກະຊວງແຜນການ ແລະ ການລົງທຶນ, ອາຄານໂຮງໝໍ 103 ກອງທັບທີ່ບ້ານໂພນປ່າເປົ້າ, ອາຄານໂຮງແຮມສິມມາແຄມຂອງ, ອາຄານໂຮງແຮມລັດສະໝີ, ອາຄານລັດວິສາຫະກິດໄປສະນີລາວທີ່ສາຍລົມ ແລະ ໂຮງແຮມລີຊາແກຣນທີ່ວັງວຽງ ແລະ ແຫ່ງອື່ນໆ.