ຕາມຂ່າວ ຕ່າງປະເທດ, ປະເທດກົງໂກ ຊຶ່ງມີບັນຫາດ້ານ ອີໂບລາລະບາດ ຫລາຍກວ່າ 1 ປີ ແລະ ໄດ້ຕົກລົງເຫັນດີກັບ ປະເທດ ຣູວັນດາ ທີ່ເປັນປະເທດໃກ້ຄຽງ ໃນການຈຳກັດ ການ ເດີນທາງ ຂ້າມຊາຍແດນ ທີ່ບໍ່ຈຳເປັນ ເພື່ອສະກັດກັ້ນ ການແຜ່ລະບາດ ຂອງເຊື້ອພະຍາດດັ່ງກ່າວ. ຂະນະນີ້ ເຈົ້າໜ້າທີ່ ສາທາລະນະສຸກ ກົງໂກ ຖະແຫລງ ຮ່ວມກັບ ຣູວັນດາ ຫລັງຈາກ ປຶກສາຫາລືກັນ ທີ່ເຂດຣາບາວູ ແຂວງເວສເທຣີນ ຂອງຣູວັນດາ ເມື່ອວັນທີ 7 ສິງຫາຜ່ານມາວ່າ: ຜູ້ທີ່ຈະເດີນທາງ ຂ້າມຊາຍແດນ ທັງສອງປະເທດ ດ້ວຍເຫດຜົນ ທີ່ບໍ່ຈຳເປັນເຊັ່ນ: ໄປຮ່ວມ ສຳມະນາ, ໄປຮ່ວມພິທີ ທາງສາສະໜາ ຈະຕ້ອງໄດ້ຮັບ ອະນຸຍາດຈາກ ທາງການ ທັງສອງປະເທດ, ຊຶ່ງເປັນໜຶ່ງ ໃນມາດຕະການ ທີ່ທັງສອງປະເທດ ຕົກລົງຮ່ວມກັນ ເພື່ອປ້ອງກັນ ການແຜ່ລະບາດ ຂອງພະຍາດ ອີໂບລາ ທີ່ເຮັດໃຫ້ມີ ຜູ້ເສຍຊີວິດ ໃນກົງໂກແລ້ວ ຈຳນວນ 1.800 ກວ່າຄົນ, ນັບຕັ້ງແຕ່ມີ ຜູ້ຕິດເຊື້ອ ຄັ້ງທຳອິດ ເມື່ອວັນທີ 1 ສິງຫາ ປີກາຍ ເປັນການລະບາດ ຄັ້ງຮ້າຍແຮງ ທີ່ສຸດໃນຮອບຫລາຍປີຜ່ານມາ.